羅馬噬錫耶納答謝支持

猪拉多纳

13/02/2012
文： 走肖

錫耶納今晚喺意甲主場對羅馬，受讓平半都要唔過。賽前兩隊球員因為怕天氣凍變雪條，曾經要求意甲聯賽會提早開波時間，「王子」托迪甚至講笑話凍到唔想隨隊，不過羅馬有500個球迷選擇「雪中送暖」，堅持跟埋去打氣，相信羅馬會搏盡開上盤報答擁躉支持。（開賽時間：周二凌晨3:45）

近4次對賽3勝1和

近期錫耶納凍到得人驚，天氣報告話今日最凍氣溫得-7度，正因為咁，兩隊賽前要求將原定開波時間由意大利時間晚上8:45，推前到下午3:00或者傍晚6:00，但意大利聯賽會唔肯調，搞到兩隊球員發晒忟憎，羅馬隊長托迪更加講笑話，咁凍唔會去比賽，兩隊臨場發揮難免受影響。


不過咁，據羅馬球迷會講，今場有500個熱情球迷堅持要隨隊出征，照計托迪同佢啲隊友聽到，必定加多兩錢肉緊，打沉錫耶納報答呢班忠心粉絲，即使羅馬有中場迪羅斯停賽，射手奧斯華度養傷，都仲有1月加盟後勁搶鏡嘅波連尼撐住，夠力殺敗近4次對賽得1和3負嘅錫耶納。