愛斯賓奴大開「薩」戒

猪拉多纳

12/02/2012
文： 鄭少偉

今季西甲每個星期日都整番場香港時間夜晚7點嘅早場，「亨利」對呢個安排就梗係舉腳贊成啦！起碼唔使下下捱更抵夜先可以睇到西甲吖嘛！今晚早場愛斯賓奴主場迎戰包尾大幡薩拉戈薩，主隊球員技術出眾，今晚睇住佢哋大勝嚟送飯，認真過癮，一於撐2.45倍「讓球主勝」啦！（now632台周日晚7:00直播）




愛斯賓奴近況都幾醒神，特別係佢哋喺主場出擊嘅賽事，通常都可以打高兩班波，近4次主場聯賽就錄得3勝1和，和嗰場亦因為對手係巴塞，對住「地上最強」都唔使輸，地頭發起威上嚟真係唔講得笑！


搶歐聯入場券戰意高


雖然愛斯賓奴開季一出閘就脫腳，成績叫支持者大失所望，但佢哋上年底開始發力，依家爬吓爬吓已經爬番上第5位，如果Keep到個勢，莫講話歐霸盃入場券，一個唔覺意有得玩歐聯外圍賽都唔奇，所以嚟緊凡佢哋主場嘅波都可以諗吓佢。




愛斯賓奴成績好轉，其中一個原因係羅馬歷、華迪美韋斯等幾件借將開始融入隊波，慢慢發揮到作用，再配合台柱祖安華度，行軍速度快，攻勢十分到肉！由於今晚對手薩拉戈薩係肥美臘肉，有幾多料唔使「亨利」再數，今晚博愛斯賓奴大炒贏波！「讓主」好路！