西布朗作客旺唔怕病「狼」

猪拉多纳

12/02/2012
文： Yennie

呢排天氣忽冷忽熱，身邊好多朋友都病咗，大家記得要着多件衫唔好冷病呀！最近歐洲大風雪，英國都唔例外，好多場波個球場都積晒雪，雖然睇落好靚，但係班球員就辛苦喇，今晚狼隊主場對西布朗場英超唔知會唔會落雪呢？點都好啦，小妹決定撐由鶴臣帶領嘅西布朗，推介下盤！（有線200及300周日晚9:30直播）


狼隊近5仗主場1和4負


小妹一直覺得狼隊教頭麥卡菲好有型，一頭銀髮同隊波真係好襯，可惜呢班「狼仔」今年戰績好唔掂，近5場喺主場得1和4負，再係咁落去佢哋隨時跌落英冠，望住麥卡菲條髮線一場比一場後移，就知佢壓力有幾大！今場嘅對手西布朗雖然稱唔上係勁旅，偏偏佢哋作客戰績唔錯，近5仗取得3勝1和1負，淨係輸過畀熱刺，仲贏過紐卡素添，小妹真係覺得狼隊冇乜勝算可言。




近排英格蘭國家隊嘅事搞到立立亂，隊長方面，小妹當然想有型又好波嘅謝拉特接棒啦，只係估唔到鶴臣居然係「三獅軍團」教頭人選嘅次熱，之前仲暗示如果英足總肯搵佢做嘅話，佢絕對會接呢個Job添！為咗博取賞識，話唔定鶴臣今場領軍會特別醒神，受讓平半固然爽，分分鐘西布朗可以全取3分而回添o架！


Yennie心水：西布朗（下盤）


半隻腳踩咗入𡃁模界，但最後決定以學業為重。如今畢業在即捲土重來，希望大家支持。外國波、本地波都係佢「飛佛」。


微博傳情 \(^O^)/


前幾日係我表姐出嫁嘅大日子，亦係我屋企近年第一次搞婚宴辦喜事！婚宴其中一個環節必定會播番一段短片，由新娘、新郎細個嘅陳年舊照開始，到長大成人，由相識、相戀，到最後結婚相。當我睇到表姐段片時真係好感動呀！兩個人從相識、相知、相戀，到最後開花結果，係一種緣分。喺度我衷心祝福表姐同表姐夫甜甜蜜蜜，開開心心，白頭到老！