多蒙特「讓球主勝」有紅利

猪拉多纳

11/02/2012
文： 蘇斯黑柴

德甲多蒙特主場迎戰利華古遜，呢場係上季聯賽冠、亞軍對壘，不過目前雙方狀態有明顯差距，雄心壯志嘅多蒙特誓保榜首，主場出擊值得信賴，足以打爆態沉兼殘陣嘅利華，推介多蒙特「讓球主勝」。




（有線61及64台周六晚10時30分直播）




多蒙特係上輪德甲前4名中唯一贏波球隊，喺榜首以兩分突圍意義重大，皆因多蒙特下半季可以更專注聯賽，能夠喺爭霸勁敵拜仁分心歐聯之前超越對手，對全隊士氣同信心幫助極大。




多蒙特近14場聯賽11勝3和保持不敗，歇冬後聯賽連盃賽4戰全勝共轟入14球，雖然近期先後有馬里奧葛斯同施雲賓達受傷，但頂替佢哋嘅巴拉斯塞高斯基同小將摩列斯列拿都有貨交，隊長基爾同今季被打入冷宮嘅巴里奧斯亦回復十足狀態，加上香川真司大爆發，現階段喺德甲主場出擊真係難尋敵手。


利華殘陣防線曳


利華目前已跌至聯賽榜第6位，被多蒙特拋離12分，少帥杜治明顯未能成功代替上季嘅軒歷基斯，無法駕馭以波歷克為首嘅一班球星，佢哋歇冬後三戰表現都令人失望，唯一勝仗主場贏緬恩斯都畀球迷柴台，防線3仗共失5球好唔穩陣，今仗仲有巴尼達、悉尼森姆、戴迪約克等主力缺陣，左閘卡特歷停賽，殘陣作客西法倫球場凶多吉少。