杜Sir技窮難逃魔掌

猪拉多纳

11/02/2012
文： Wendy

今晚英超又有「雙紅會」睇，雖然我未買3D電視，但睇高清已經夠晒精彩！場波雖然未踢，但賽前雙方球員已經隔空嚟料，例如上輪利物浦對熱刺，朗尼就一邊睇波一邊喺twitter度抽水，話蘇亞雷斯踢中柏加心口，應該被趕出場！


我都有睇直播，當時仲以為呢個「哨牙蘇」出場三分鐘，就可以提早返入更衣室沖涼，點知球證又放過佢一馬！嗰場蘇亞雷斯好彩，但今晚喺奧脫福就肯定唔會再咁夠運，班「紅魔」球迷肯定「招呼」到佢完場，實行噓到佢腳軟！


蘇亞雷斯呢宗「歧視案」雖然冇片為證，但當日除艾拉投訴外，就算自己人古積特賽後嘅口供對佢都好不利，「利記」都知好難打得甩，所以亦放棄上訴，依家賽都停完，杜格利殊先嚟撐話愛將冇做過！其實講嚟都冇用，「大帝」你都係留番啖氣部署呢場大戰好過，連我呢個曼聯迷都知你淨係識逢親去到六十分鐘就換人啦！

曼聯「追車」士氣盛

「利記」擁躉梗唔鍾意聽我直說直話，「大帝」又點？杜格利殊戰術平淡係事實，尤其係一落後或者陷於老鼠拉龜狀況時，成班波就方寸大亂，比較下，以前由賓尼迪斯帶隊嗰陣，反而戰術變化仲多好多。


雖然過去一年曼聯三次對住「利記」都未贏過，但咁啱呢三次都係作客，今晚一於趁奧脫福主場大報復。若然曼聯先開紀錄，以「利記」今季愈踢愈亂嘅走勢，應該冇得追。就算一個唔好彩畀「利記」作客先入波，以「紅魔」從後追上嘅凌厲攻力都未驚過。有睇上場作客車路士都知，「費蛇」一㩒掣，班「紅魔」狂風掃落葉嘅攻勢有幾勁啦！所以唔只支持主勝，曼聯今次讓半一，上盤更加要得過呀！


（有線200及300台周六晚8時45分直播）

熱愛舞蹈的Wendy，2004年歐國盃Euro Babe變身成為有線球彩台節目主持，當初對足球猶如混沌初開，依家已滾瓜爛熟，最愛暢談波經。