粒粒巨星 激情四射 阿甲睇真啲

猪拉多纳

10/02/2012


阿甲出產無數世界級球星，冇阿甲就冇球王馬納當拿，現時阿甲球隊喺「南美歐聯」南美自由盃22次捧盃，更加勁過巴甲球會嘅15次。由於阿甲以春季、秋季兩循環舉行，令到爭標過程更激，即使唔係傳統強隊都有機會爭冠軍，最緊要係比賽多數喺香港時間朝早開波，啱晒歎緊早餐、搭車返工落注。




雖然近年阿甲球隊喺自由盃風頭唔及巴甲球會，但咁唔代表阿甲觀賞價值下降，唔好忘記，現時嘅皇馬射手希古恩06年仲踢緊河床，曼城球星阿古路都係06年至離開獨立隊，而且上季冠軍小保加嘅20歲新星沙治奧阿拿祖，被喻為阿根廷次世代超級新人，華倫西亞同馬德里體育會已吼實佢。


Check Point 1︰盛產性格巨星


　假如話巴西足球賞心悅目，阿根廷足球就肯定係激情四射，以往阿甲培育出嘅世界級球員，幾乎全部係性格巨星，球王馬納當拿同射手巴迪斯圖達好波有火唔在講，即使臨近掛靴年齡嘅小保加大腦列基美同學生隊隊長華朗，都係平時唔出聲，郁親就嚇你一驚，其他聯賽，未必畀到你呢種南美激情。


Check Point 2︰春秋聯賽有別歐洲


歐洲主流聯賽以主客兩循環賽事進行，但阿甲就唔同，春季同秋季聯賽都有冠軍誕生，簡單啲講，可以理解成每個單循環都有冠軍球隊。正因為場數少，傳統強隊容易倒灶，近年就出現過小阿根廷人、班菲特同拉魯斯攞冠軍，唔似西甲唔係皇馬就巴塞，球迷有機會見證撐開嘅球隊捧盃，自然更狂熱！


Check Point 3︰賽制特殊鬥到七彩


另外，阿甲基本上以近季「平均成績」定出邊幾隊踢自由盃，同埋邊幾隊要降班，所以即使位列中游，依然為未來搏命搶分，唔可以因為爭標冇望或者唔憂降班，專登放軟手腳，無形中令整個聯賽競爭性更強，上季貝格拉諾、高隆、拉魯斯同堤格雷入到前列，今季可能再有其他球隊爆出。