禾堡新兵撻着恰弱旅

猪拉多纳

10/02/2012
文： 蘇斯黑柴

德甲獨腳戲禾夫斯堡主場對弗賴堡，禾堡歇冬期豪使三千萬歐元收購8名新兵，經過3場硬仗後已逐步上力同融入球隊，整體戰鬥力一仗比一仗進步，今晚主場面對包尾大幡勝望甚濃，捧主Ｗ。（有線61及201台周六凌晨3時30分直播）




禾堡嘅名帥馬加夫近季有鋪「集郵」癮，無論帶領邊支球隊，每季都起碼要收購廿名球員以上，黑柴一直懷疑佢同球員經紀有緊密關係，買球員有回佣收，今季季前佢已經引入超過10名球員，但成績只居聯賽榜下游，不過無論點，禾堡高層感激佢喺08-09年帶領球隊奪標嘅豐功偉績，對佢無條件支持，歇冬期又畀佢用3,000萬歐元入貨，馬加夫再冇成績交就點都講唔通。


弗賴堡後防折大將


今次買入呢８件新兵名氣唔算大，但勝在年輕實際，當中以巴西中堅菲臘比盧比斯表現最對辦，另外捷克中場積拉錫、科特迪瓦前鋒施奧同貴價瑞士左閘列卡度洛迪古斯表現都一仗比一仗好。禾堡上仗對大勇嘅慕遜加柏仲全場佔盡上風，和得唔抵，睇嚟成績仲有上升空間；相反弗賴堡歇冬後大放血，倚重多名小將撐場，雖然表現比預期好，但質素同經驗不足，上仗對不來梅更有全場表現最佳嘅主力守將卡馬斯勇戰受傷，佢哋共失44球嘅防線本來已經係德甲最差，少埋呢件大將，更難抵擋主隊強攻。