不敗之師祖記「+1」Ａ級之選

猪拉多纳

08/02/2012
文： 巨高

意大利盃四強首回合，AC米蘭主場對祖雲達斯。兩支球隊於二月將會進行三次對賽，最重要當然係二月尾嗰場意甲大戰，故雙方會利用今場盃賽熱吓身。留意到今季祖記無論盃賽及聯賽都保持不敗，似乎目標唔只意甲咁簡單，依家「斑馬兵團」仲揸住條不敗靚績，受讓捧「讓球客勝」。


（廣東體育頻道周四凌晨3時45分直播）


AC近況唔係好，近兩場比賽都贏唔到兼冇入球，尤其周日喺主場與拿玻里打和○比○，演出更令人失望。另外，今季AC主場成績唔算好，對住有一定實力嘅球隊都冇好結果，除剛啱提及嘅拿玻里之外，今季主場對烏甸尼斯及國際米蘭都贏唔到，祖記又使乜唔赦呢支米蘭球隊呢？

AC米蘭天殘地缺

人腳方面，因AC陣中有唔少球員有傷，包括阿古蘭尼、法米尼、卡斯辛奴、奇雲保定、加度素、尼斯達及柏圖等，同一班球員要頂硬上踢埋周中盃賽，體力成為今場最大疑點。


相比之下，「斑馬兵團」就齊腳得多，佢哋唔只後備陣容鼎盛，隊內亦冇傷兵，教練干地可揀選最佳陣容迎接今場比賽。值得留意喺基亞卓尼利，呢個球員雖然細細粒，但勝在腳法了得控波唔甩，喺前場扭扭吓經常搵到食，今場好大機會打正選。總括嚟講，祖記陣容及賽績都比AC優勝，巨高認為「讓球客勝」捧得過。