祖記夫添「錫」破天驚

猪拉多纳

05/02/2012
文： Katie

紅極一時嘅愛爾蘭搖滾組合The Cranberries，昔日隻隻歌都咁經典，女主音Dolores O'Riordan嘅唱腔又夠晒獨特，你睇吓連王菲都要學佢唱歌，就知Dolores猛料啦！呢隊Band解散咗6年之後終於喺09年重組，嚟緊4月仲會嚟香港開騷添，唔知有冇知音人會陪Katie去睇呢？




The Cranberries重組之後一樣咁正，馬田卡沙利斯重返祖雲達斯，亦令Katie非常期待。呢位靚仔鐵衞昔日喺「斑馬兵團」冇貨交，但之後轉戰西維爾愈踢愈醒，上年仲幫烏拉圭捧走美洲國家盃添，經過咁多試練，相信佢嘅戰鬥力已經全面提升。今次卡沙利斯回巢，揀番件4號波衫嚟着，佢話希望複製烏拉圭前輩蒙迪路嘅成功之路，Katie睇好你架，畀心機！


前鋒柏比 馬特尼弗爆


家陣嘅意甲「一哥」祖雲達斯，今晚會喺主場恭候錫耶納，雙方喺周中場波都因為風雪改期，祖記唔單止有馬田卡沙利斯回巢，仲買咗件18歲阿積士小將奧森保爾，陣容勁完整，最令人振奮嘅係前鋒胡仙歷因為周中冇波打，傷勢已經好番晒，今仗可以隨時候命，有佢搭住柏比、同狀態弗爆嘅馬特尼攻堅，邊使慌冇波入吖！


錫耶納訓練基地因風雪停用


對家錫耶納就陰功咯，Katie賽前做足晒功課，知道錫耶納受風雪影響，喺自家訓練基地根本練唔到波，前日朝仲要特登走去維亞雷焦嗰度做簡單操練，無啦啦搞到舟車勞頓，點計都對球員有影響，況且佢哋近5場意甲作客輸晒，當中造訪帕爾馬都要失3粒，今晚對住「一哥」祖記，隨時輸鑊勁都似。「斑馬兵團」個1.85倍「讓球主勝」，當然係穩如泰山啦！（開賽時間：周日晚10:00）


微博傳情 \(^O^)/


情人節就快到，唔知各位諗住點同另一半慶祝呢？最近有朋友同Katie呻，佢話聖誕節、大除夕同情人節輪流殺到，淨係買禮物同食飯都搞到大出血，份雙糧仲極速使晒添，嚟緊都唔知點算好！




咪話Katie唔畀貼士大家吖，好多女仔包括我在內，查實覺得男友夠唔夠浪漫，唔一定要用錢去衡量嘅，送禮物最緊要係講心思，如果男仔可以親手整啲嘢食或者小飾物送畀女朋友，對方一定好似我抱緊隻狗仔個樣咁冧啫，各位觀音兵，收到未呀？哈哈！^^

Katie推介：祖雲達斯（讓球主勝）

外國長大，半個鬼妹仔，自細因爸爸成日帶朋友返屋企睇波而愛上足球，鍾意睇靚仔但唔會盲目追捧，最緊要係好波。