球員衰多口 主帥要教好

猪拉多纳

05/02/2012
文： 黃興桂

近期睇歐洲賽事，發生好多禍從口出嘅不快事件。不少球員於比賽期間，抵唔住頸向對手惡言相向，當中仲離譜到作出種族歧視，就好似蘇亞雷斯被重罰停賽八場，泰利仲嚴重到要上庭。其實球員場上操行零分，領隊責無旁貸，你唔去管唔去理，最後損失嘅只係球隊。




或者大家會問，點解以前唔見咁多球場種族歧視案件？其實呢個問題一直於球圈存在，只係以前場上攝影機冇咁先進，依家球員於球場做過乜、講過乜，好易被拍低，過後想抵賴都唔得。既然係咁，球員就更應該規行矩步，唔係就肯定大禍臨頭。


教波要兼顧好多嘢


種族歧視喺呢個年代，係絕對不能接受嘅罪行，但因為好多球員所受教育都唔多，領隊就更加應該去教佢哋，話畀佢哋聽乜嘢係唔做得。領隊呢份工唔係咁易撈，絕非淨係教波咁簡單，如果未能瓣瓣兼顧，就唔可以話係好領隊。




另外，做教練、球員場上係要努力求勝，但賽前、比賽中都唔好咁多嘢講，萬一激起對方爭勝心，你話幾咁無謂？再講你贏咗波，成績已說明一切，根本唔使用把口，去話畀人知你勁過對手！




金句：挑釁對手唔要得　口密工作教練當