文仙尼冇膽曼城變門口狗

猪拉多纳

04/02/2012
文： 江忠德

一個人嘅性格絕對會影響命運，甚至影響埋成隊波嘅成績。好似曼城領隊文仙尼自上任後，一味淨係識得叫老細開水喉買人，但就冇好好利用手上嗰副好牌，尤其係作客時就玩龜縮，主場先識得「晒冷」，係導致曼城今季得番一項英超錦標角逐嘅元兇。




曼城呢季作客大炒過曼聯同熱刺，千祈咪以為佢哋好醒，實質係對手當時突然走樣，其後作客對住中下游球隊照樣失分。講番文仙尼，由佢帶領曼城開始計起，班波客勝率一直低於五成，喺重要關頭包括歐聯作客時往往輸波而回，成為曼城力爭上游嘅絆腳石。


爭英超鬥富咸不容再失


講得難聽啲，文仙尼正一冇膽鬼，逢親作客多數以穩守為先，雖然人強馬壯，但就唔敢輕舉妄動，球員身嬌肉貴又要避重就輕，唔似喺自己地頭有恃無恐咁踢得夠放。依家喺英超本土盃賽玩完，歐霸盃有如雞肋，真係應晒班主所講重點擺晒喺英超冠軍嘅原則，家陣同曼聯平起平坐，梗係要喺主場盡數搶番優勢。




富咸偶有佳作，弊在作客認真靠唔住，尤其係幾個後衞轉身慢，遇上大衞施華同阿古路呢啲咁刁鑽嘅前鋒肯定會好頭痛，況且近排啲球證動不動就判罰極刑，確係戥富咸條防線擔心。