漢堡跌Watt難擋拜仁

猪拉多纳

04/02/2012
文： 蘇斯黑柴

周六德甲壓軸戲上演南北打吡，漢堡主場迎戰拜仁慕尼黑，漢堡近季主場對拜仁戰績雖佳，不過今季人腳實力明顯下滑，現時同班霸拜仁嘅實力差距已告拉遠。拜仁爭標形勢緊湊一分都不能少，憑強大進攻火力足以征服恩達球場，黑柴捧2.1倍「讓球客勝」。（有線61及201台周日凌晨1時30分直播）




漢堡主場向來唔赦拜仁，近四季擁有兩勝兩和不敗佳績，可惜今季誤於體育主管阿連臣，放走多名骨幹後，只買入一批實力平平嘅二線兵，人腳實力大不如前，雖然喺去年十月中搵到新帥芬克執教，成績總算有起色，佢領軍後10場聯賽只輸過1場，但要留意贏亦唔多，只有3場，而且絕大部分對手都係弱旅，唯一遇上嘅強敵係前仗主場對多蒙特，結果慘敗1:5收場，整體演出水準根本唔高，而且芬克向來同拜仁關係密切，更成為拜仁老帥軒歷基斯嘅熱門繼任者，喺拜仁爭霸形勢咁緊湊關頭，橫掂搏盡都未必夠踢，隨時做個順水人情，留番啖氣下場作客科隆至搏。


列貝利激活拜仁鋒線


目前德國氣溫低於攝氏零度，無疑增加咗拜仁今仗北征難度，佢哋近期狀態亦唔理想，歇冬後不敵慕遜加柏同小勝禾夫斯堡，顯示球員狀態未夠銳利，不過經過兩場硬仗熱身，預期今仗會有進步演出。拜仁今仗防線陣容不整，雲拜頓同迪亞高干坦圖因傷缺陣，拿菲爾停賽，要由巴西防中路爾斯古斯達禾客串中堅，不過面對攻力非強嘅漢堡應該頂得住，拜仁前線鋒力實在太強，「國王」列貝利上仗停滿復出後已激活球隊鋒線，今仗有力撕破至今已失33球嘅漢堡脆弱防線。