AC玩殘拉素老人鋒線

猪拉多纳

01/02/2012
文： 朱楓

要數意甲近期至弗球員？一定係AC米蘭前鋒伊巴謙莫域，入波、助攻都一手包辦，今晚佢帶領「紅黑兵團」作客拉素，要贏話咁易啦，小讓平半必捧上盤！（now633、660台及中央5台周四凌晨3:45直播）




其實AC米蘭今季一直飽受傷兵困擾，好似依家咁，前鋒柏圖、卡斯辛奴、中場法米尼、加度素、阿古蘭尼、奇雲保定同中堅耶比斯都仲抖緊，1月回巢嘅梅基爾仲因右膝內側副韌帶拉傷要抖8周。




雖然有咁多十字軍，不過AC今季整體表現仍然好穩定，日前主場大勝卡利亞里後更錄得3連勝，取得咁好成績，連續3場都有波入嘅前鋒伊巴謙莫域絕對係最大功臣，呢位瑞典神箭今季踏入生涯高峰，根據統計，佢今季上陣23場射入21球，幾乎平均1場入1球，上場對卡利亞里，交出1個入波同1次助攻不特止，仲射入加盟AC後首個罰球，試問仲邊有人箝制到佢？


施斯落實投昆士柏流浪


連輸畀米蘭雙雄嘅拉素，上場成功反彈，作客大勝基爾禾3:0，賽後仲趁國米輸波升番上第4，兼有傳就快簽入日本中場本田圭佑，本來士氣相當好，點知最新消息指，「藍鷹」已經落實將前鋒施斯賣畀昆士柏流浪，最搞笑係竟然想斟AC米蘭老將射手恩沙基做替代品，據講呢單嘢成數機會極高。




拉素今場好可能搵34歲嘅洛基擔正，夥拍33歲嘅高路斯攻堅，淨係速度已經輸晒啦！再睇埋拉素近13次主場對AC竟然1場都未贏過，對上一次喺奧林匹高球場贏「紅黑兵團」竟然係98年嘅事，今晚睇怕都係凶多吉少咯！