保頓Friend底 送W畀廠仔

猪拉多纳

01/02/2012
文： 走肖

英超有冇黑金或者枱底交易，我冇能力話你知，不過保頓今晚喺英超主場對阿仙奴，教頭奧雲高尼賽前起勢落嘴頭，終於冧掂兵工廠領隊雲格外借宮市亮畀佢哋救亡，既然兩隊咁Friend底，今場簡單啲捧阿仙奴1.58倍客W啦！（有線200、300及廣東體育周四凌晨4:00直播）




據講飛燕諾、華倫西恩斯同富咸都好有興趣借用宮市亮，但最終都畀保頓成功借到佢返嚟幫手護級。由於亮仔都係屬於高速型翼鋒，搵佢頂替今季因斷腳長抖嘅李青龍，簡直最適合不過，依家真係借得成，正值3連勝嘅保頓嚟緊會踢得更醒神，護級成功絕對唔係奢望。


保頓近12次交手11敗


或者就算保頓受咗恩惠借到宮市亮，你可能覺得佢哋唔會鬆3分畀兵工廠，但其實近12次對賽保頓得1勝11負，可以話畀對方恰到上心口，呢場拗氣搏盡好可能嘥彈藥，所以保頓留吓力，儲夠能源跟手再同諾域治鬥過，都係順理成章，講到底，對諾域治搶分嘅機會，點都比對兵工廠大嘛。


阿仙奴亨利 阿迪達好番晒


再講，就算保頓唔專登鬆章，阿仙奴都夠晒條件添食，首先射手亨利、中場阿迪達同右閘沙格拿上場對維拉分別後備入替，證明傷勢好番好多，其次隊長尹佩斯連續3場入波不特止，暫時仲以19球領先射手榜，有佢孭飛阿仙奴今場贏波容乜易呀！