拉素ＡＣ Goal手過招

猪拉多纳

01/02/2012
文： 巨高

周四凌晨意甲快車重頭戲，AC米蘭作客鬥拉素，AC近況雖然好，可惜陣中傷兵多，而且拉素今季主場唔好惹，AC作客讓波有暗湧。考慮到兩軍射手近況都咁弗，伊巴謙莫域、高路斯頻頻有士哥，今場揀大盤仲穩陣。




（now 633及660周四凌晨3時45分直播）




兩軍上月尾於意大利盃八強碰頭，當時AC米蘭憑主場之利贏三比一，計同此仗在內，AC已經連贏三場，狀態弗到漏，當中射手伊巴謙莫域更個人射入四球，勒都勒唔住，不過佢哋陣中有唔少傷兵，奇雲保定、阿古蘭尼、加度素、法米尼、卡斯辛奴、柏圖、耶比斯、梅基爾全部因傷倦勤，入到波時，恐怕防線亦會有唔少漏洞，難保不失。


超級射手「大」格鬥


拉素今季表現驚喜，其中十場主場聯賽僅輸兩場，不敗率達八成。除咗剛才所提及嘅意大利盃八強賽事，聯賽首循環兩軍碰頭亦踢成二比二，證明彼此都有能力入到對手波。




拉素箭頭高路斯於聯賽射入十二球，AC中鋒伊巴謙莫域則有十五球進帳，兩軍決戰之前，拉素主帥利查就話高路斯勁啲：「佢哋兩個踢法唔同，伊巴謙莫域花巧啲，而且傾向個人主義，高路斯實際好多。」與此同時，AC早前為新兵麥斯盧比斯舉行記招，呢位阿根廷前鋒表明會全力爭位。