突尼西亞爭首名鬥志可「加」

猪拉多纳

31/01/2012
文： 亨格比利

非國盃C組今晚爆發榜首大戰，由東道主之一嘅加蓬硬撼突尼西亞，爭奪首名出線資格。突尼西亞整體人腳平均，唔似得加蓬要靠奧巴美揚單天保至尊，突尼西亞客W有成3倍值得捧場。（now676台周三凌晨2:00直播）


目前加蓬同突尼西亞喺C組同得6分，雙方都篤定晉級，不過得球較少嘅突尼西亞今仗要贏先可以首名出線，所以賽前突尼西亞領隊查比斯都話冇嘢好輸，會大打進攻足球，鬥心毋須懷疑。


亨格比利打從上年底開始留意突尼西亞，發覺呢班波嘅備戰工夫做得唔錯，11月頭已展開一連串熱身賽，當中曾以2:0砌低以畢爾包球員為骨幹嘅巴斯克特選隊，同埋逼和有沙維壓陣嘅加泰羅尼亞聯隊，戰鬥力有番咁上下。

加蓬上場贏波靠運氣

唔係話加蓬唔好，不過從頭兩輪分組賽嚟睇，呢支東道主明顯係靠鬥志去彌補技術不足。再講，加蓬上仗搞到補時7分鐘先絕殺摩洛哥，唔多唔少有幸運成分，畢竟對家賽前突然有主力射手查馬克食物中毒缺陣，影響晒臨場部署，加蓬今晚遇正實而不華嘅突尼西亞唔會咁好彩！

賽制：

16支球隊分4組進行單循環分組賽，每組首兩名躋身8強淘汰賽，同分會先以對賽成績定名次。