曼市雙雄 午夜危情

猪拉多纳

31/01/2012
文： 樂比堅尼

香港時間周三凌晨有五場英超快車賽事，目前在榜首領放嘅曼徹斯特雙雄分途出擊，「紅魔鬼」主場對史篤城（有線200及300台周三凌晨4時直播），曼城作客對愛華頓（有線201及301台周三凌晨4時直播）。曼市雙雄牌面秤先，惹飛難免，不過兩軍各具缺點，今仗難言穩勝，寧揀曼聯細及愛華頓「讓球主勝」。


史篤城專打老虎 紅魔殘陣捱細界


曼聯上周足總盃以一比二不敵利物浦出局，下半季可以疊埋心水踢聯賽，不過曼聯目前傷兵名單水蛇春咁長，除朗尼肯定缺陣外，拿尼、艾舒利楊格、菲爾鍾斯、路爾斯安達臣、尼曼查維迪、費查同埋湯卡華利都養傷，加上貝碧托夫同查維亞靴南迪斯冇態，要強攻史篤城都有一定難度！


「小豌豆」陷入球荒


事實上，曼聯今季聯賽進攻好倚賴朗尼，佢射入十三球，係球隊首席射手，其他前鋒好似韋碧克同貝碧托夫表現較為飄忽，而「小豌豆」查維亞靴南迪斯更陷入球荒，喺缺少咗艾舒利楊格同埋拿尼兩隻翼鋒後，曼聯進攻瓣數大減，踢法顯得較為單調，有利史篤城密集防守。




眾所周知史篤城係強隊剋星，其簡單直接踢法，令好多強隊吃過苦頭，今季已贏過熱刺、利物浦，另外亦和過車路士，首循環主場對曼聯時，喺落後嘅情況下追和一比一，可見兩隊波嘅水平唔係想像中咁遠，既然曼聯冇乜進攻板斧，史篤城又出名守得，今場一於捧細盤。


曼聯近七次對史篤城賽果


日期 賽果




25/09/11 史篤城1:1(0:1)曼　聯

05/01/11 曼　聯2:1(1:0)史篤城

24/10/10 史篤城1:2(0:1)曼　聯

09/05/10 曼　聯4:0(2:0)史篤城

26/09/09 史篤城0:2(0:0)曼　聯

26/12/08 史篤城0:1(0:0)曼　聯

15/11/08 曼　聯5:0(2:0)史篤城