撐摩洛哥響頭炮

猪拉多纳

23/01/2012
文： 力奇

今日新正頭，非國盃上演兩場C組賀歲戰，其中喺加蓬舉行嘅摩洛哥對突尼西亞，係04年決賽嘅翻版「北非打吡」，力奇睇好摩洛哥有望復仇成功，事關佢哋喺主帥謝列斯帶領後踢得相當出色。反觀突尼西亞近年換帥頻繁，平手盤捧摩洛哥穩陣得多。（now676台周二凌晨3:00直播）




北非王者兼對上3屆冠軍埃及喺外圍賽出局，摩洛哥同突尼西亞自然要為爭做北非「一哥」搏老命。由於同組加蓬同尼日爾實力麻麻，因此今仗勝負將係關乎首名出線資格，一旦攞到首名會走好線，唔難殺入4強，反而次名出線隨時撞正奪標大熱加納，都咪話唔大鑊。


突尼西亞王牌射手養傷


由比利時名帥謝列斯帶領嘅摩洛哥，喺外圍賽D組更係輕鬆壓過勁旅阿爾及利亞以首名出線。佢哋喺6場外圍賽僅失2球，前場則有查馬克、泰拉拔同尤素夫夏積3個外流歐洲球星孭飛，同樣值得信賴。




突尼西亞自08年起共換7名主帥，球員適應需時，今屆外圍賽都要踢到最後一輪擊敗多哥先叫做攞到次名出線，最具知名度嘅歐塞爾前鋒祖馬亞亦因傷缺陣，睇番佢哋之前熱身賽對住科特迪瓦都淨吞2蛋，仲點捧得落手。