博漢堡「主勝」咪心「多」

猪拉多纳

22/01/2012
文： 亨格比利

德甲重開之後，亨格比利對漢堡最有期望，事關自從芬克接掌之後，成班波可以話係脫胎換骨，難怪連「凱撒大帝」碧根鮑華都對芬克直豎拇指。漢堡今晚主場出擊，對住人腳唔齊嘅多蒙特有望乘勇搶分，2.05倍「讓主」要捧場。（有線61、64及201周日晚10:30直播）




芬克上年10月由巴素利過檔漢堡，領軍8場聯賽保持不敗，帶領球隊由降班區域嘭嘭聲殺番上中游，最近仲雄心勃勃話要率領漢堡爭取歐洲賽入場券，家陣班球迷個個都當佢神咁拜。佢老人家同漢堡份約雖然到2014年先至屆滿，不過碧根鮑華就對芬克寄予厚望，睇好佢將會成為下任拜仁主帥，芬克畀「凱撒大帝」煲到天下有地下無，今晚歇冬後首炮又點可以失威吖！


多蒙特勢缺馬里奧葛斯


對家多蒙特出閘脫腳後亦都重返正軌，不過衞冕之路就受到極大打擊，皆因今季貢獻5個入球兼5個助攻嘅馬里奧葛斯鼠蹊受傷，教練高普話佢只得4%上陣機會，無謂冒險派呢位新星落場，再加埋門將維丹費拿同右閘比薛斯基都因傷上陣成疑，攻守兩瓣肯定受影響，造訪只得土耳其中場高漢托尼倦勤嘅漢堡根本讓唔起！