惡霸曼城追擊熱刺殘兵

猪拉多纳

22/01/2012
文： Yennie

除夕夜英超連場激戰，仲有3D直播，唔睇又點得先？曼城主場迎戰熱刺呢場波，對爭標形勢有好大影響，雖然一隊係1哥、一隊係3哥，不過唔少球迷都記得首循環熱刺曾經畀曼城炒5:1，今鋪佢哋作客惡到爆嘅曼城，睇怕好難有運行，我捧1.72倍主W。（有線200、204（3D版本）、300及廣東體育周日晚9:30直播）




今個冬天曼城一直未有增兵行動，據領隊文仙尼所講，近排佢哋仲大鬧「球員荒」添！咁又係，托尼兄弟走咗去打非洲國家盃，表面睇確係唔夠人使，不過大家諗真啲，尼祖迪莊可以頂替耶耶托尼，防線依舊有尼史葛同米卡李察士支撐，根本就冇影響，如果唔係，文仙尼點會咁淡定唔買人吖？


主場10戰全勝喪入31球


再講，佢哋件中場大衞施華真係堅勁，上場對韋根佢就踢出身價波，至今佢已為曼城貢獻咗15次助攻，加埋阿古路、迪斯高同巴洛迪利任揀，進攻組合咁多，配合曼城主場10戰全勝喪入31球佳績，使驚贏唔到咩！




對家熱刺上仗主場只能摸和狼隊，令人跌晒眼鏡，始終領隊夏利列納帶波一直冇輪換，主力幾乎場場踢足，唔殘就奇啦！就好似上場對狼隊咁，班熱刺兵都好似跌Watt，尤其係雲達華治最令人失望，搞到中場組織冇之前咁銳利，今鋪想唔輸都難。


Yennie心水 曼城（勝）


半隻腳踩咗入o靚模界，但最後決定以學業為重。如今畢業在即捲土重來，希望大家支持。外國波、本地波都係佢「飛佛」。


微博傳情 \(^O^)/


人哋話係女仔都係貪靚，都會鍾意着婚紗，當然我都唔例外啦！咁大個女第2次着婚紗，其實又係為咗幫朋友影婚紗相。哈哈，我諗下一次再着住婚紗嗰時，應該會係我搵到如意郎君出嫁嘅時候啩！雖然啲晚裝裙好單薄，天氣又凍，但都無損我影相嘅雅興。大家覺得上一輯靚啲，定係今次呢一輯靚啲呢？仲有，同大家拜個早年先，祝大家新一年身體健康，事事如意，心想事成！