廠魔唔識守 3D大激鬥

猪拉多纳

22/01/2012
文： 阿占

3D大戰迎龍年！聽日就係大年初一，阿占先拜個早年祝大家波運亨通！今晚有線204台會創先河以3D直播英超賽事，當然屋企未有3D電視嘅觀眾，同樣可以喺200台同英超300台睇直播。唔使講今晚嘅重頭戲當然係阿仙奴主場硬撼曼聯啦！雖然首循環曼聯狂勝8:2，但阿仙奴今時唔同往日，紅魔唔易重溫好夢，反而1.8倍「入球大」仲抵博！（有線200、204（3D版本）及300、廣東體育周一凌晨0:00直播）




回想上年8月開季初段，曼聯喺奧脫福狂數阿仙奴，但當時兵工廠啱啱走咗法比加斯同拿斯尼，幾名新兵又未到，再加上大量傷兵，廠仔嗰場波簡直係天殘地缺！相反曼聯嗰陣正值巔峰，朗尼、艾舒利楊格同韋碧克入波入到停唔到。但今時已經唔同往日，阿占唔認為曼聯今晚可以再咁易贏波囉！


阿仙奴兩閘現缺口


不過崇尚進攻踢法就係呢兩隊波改唔到嘅天性。阿仙奴雖然聯賽2連敗，但尹佩斯同禾確特上場齊齊喺2012年開齋，老牌英雄亨利又回歸助陣，呢條進攻線射術、速度同經驗瓣瓣有，入波唔成問題！不過阿仙奴嘅兩閘荒遲遲未解決，沙格拿、贊堅臣、基蘭基比斯、安德里山度士仍然養傷，上場史雲斯就係睇中阿仙奴呢個缺口搵到食啦！


曼聯作客多波入


不過曼聯近期表現亦唔多穩定，好在前鋒朗尼同韋碧克腳風轉順，贏完曼城3:2再炒保頓3:0，而且今季合共16場作客賽事中，只有1場入唔到波，今晚要喺酋長球場入到波唔難。不過佢哋防守都有問題，消息話里奧費迪南因腦震盪今場未必可上陣，加上本身有傷嘅菲爾鍾斯同尼曼查維迪，中門大開容乜易同阿仙奴合演3D入球騷。


廠仔主場6連細


‧近6仗主場得3勝2和1負全細。




‧自9月起未嘗於聯賽主場落敗，期間每場最多只失1球。

紅魔神童射爆廠

‧近9場6勝3負，當中8場開大。

‧朗尼於過去6次對阿仙奴共攻入6球。

頂占筍盤：阿仙奴（入球大）

有線球彩台主持 阿占

電郵：soccer64@cabletv.com.hk

球彩群組：http://fb.com/icable64

PHONE波熱線：1831 678

開放時間：周日晚10:00至周一凌晨2:30（快樂星期天）