馬高列奧斯為新舊東家而戰

猪拉多纳

20/01/2012


慕遜加柏攻擊主力馬高列奧斯係今季德甲人氣王，佢已經落實下季去向，毅然拒絕咗今仗對手拜仁嘅邀請，夏天將以1,750萬歐元轉會費，加盟拜仁死敵多蒙特，今仗自然成為比賽焦點。




馬高列奧斯今季成為風頭躉，力壓多蒙特馬里奧葛斯同拜仁舒韋恩史迪加，當選為德國權威網站《踢球者》首循環德甲最佳球員，佢首循環只缺陣兩場比賽，結果慕遜加柏賽和多蒙特同不敵奧格斯堡，共失五分，足見佢對球隊有幾重要。




德國傳媒近日報道，馬高列奧斯拒絕加盟拜仁，原因係拜仁唔能夠承諾畀佢主力位置，但佢就對事件作出反駁，認為多蒙特至係佢心目中德甲最佳球隊，擺明唔放拜仁在眼內，不過現階段佢只會專心為慕遜加柏爭取下屆參戰歐聯資格，目前多蒙特只落後拜仁三分，若然今仗能成功令拜仁失分，對現任同未來東家都會係一大好事。


主場表現最生猛


馬高列奧斯向來係主場王，今季為慕遜加柏取得十個入球四次助攻，其中主場八次上陣，已取得當中八個入球同全部四次助攻，今晚當然係慕遜加柏狙擊拜仁嘅最有力武器。拜仁方面可能因為吃不到的葡萄是酸的，隊長拿姆聲言慕遜加柏並唔係一人球隊，今仗唔會刻意嘜佢喎！