國米爭盃冇留手「主W」唔怕熱

猪拉多纳

19/01/2012
文： 走肖

意大利盃邊隊最抵撐？梗係近7屆6次入決賽嘅藍黑兵團啦！國際米蘭今晚喺意大利盃16強主場對熱拿亞唔似會留手，傷愈嘅史奈達更加要踢好波證明身價，對家熱拿亞嘅新教練馬連奴執唔掂個豆腐後防，唔似惡得出樣，熱捧國米開2倍「讓球主勝」有着數。（開賽時間：周五凌晨4:00）




自從莫連奴離隊國米就開始平庸，今季甚至試過喺聯賽下游掙扎，直至搵到雲尼亞里執教，最近至算真正做到止跌回升，聯賽近6戰全勝，由於現時國米仲落後緊榜首嘅祖雲達斯6分，意大利盃絕對係佢哋捧盃止咳最佳良藥，有理由相信雲尼亞里唔會派太Hea陣容出戰，近7屆6次入決賽、4次攞冠軍冇理由想失威。


熱拿亞3戰失11球


最緊要係，目前國米嘅傷兵問題好番好多，原本養傷嘅科蘭、史奈達同捷禾對AC分別以後備姿態上陣，前中後3線兵源都強番好多，當中史奈達有可能因為人工高被清洗，無論佢想留低抑或跳船，呢個時候都應該要加多兩錢肉緊踢好波，否則搶唔番個正選位之餘，又走唔成就有排捱。




至於近8場作客得1勝1和6負嘅熱拿亞，由於後防老大哥卡拿斯未好番，近3場失11球嘅恐怖防線唔似止到瀉，更何況新教練馬連奴上任冇耐，領軍兩場失5球證明執唔掂後防，即使熱拿亞剛啱喺聯賽以3:2砌低烏甸尼斯，唔代表旺勢咁容易可以延續，而且意大利盃1場過決勝負，想再偷雞爆冷有難度。