愛斯賓奴為踢歐戰爭盃

猪拉多纳

17/01/2012
文： 朱楓

西班牙盃8強首回合今晚展開，愛斯賓奴打頭陣喺主場接受丙組仔米蘭迪斯嘅挑戰。愛斯賓奴近排愈踢愈好，最重要係佢哋會長講明希望爭踢下屆歐洲賽，目標鮮明，2.17倍「讓球主勝」真係幾抵博㗎！（開賽時間：周三凌晨4:00）




愛斯賓奴繼西甲作客打和巴塞、喺西盃主場大勝科爾多瓦4:2，兩回合計反勝5:4晉級後，日前喺西甲作客又逼和西維爾，可惜賽後仍然排第9，難怪會長干達爾承認爭西盃先係攞下屆歐洲賽入場券最佳方法。其實愛斯賓奴近年喺西盃成績唔錯，而且仲有個慣例，就係隔6年必捧盃一次，今屆絕對係繼00同06年捧盃後，再攞冠軍嘅好時機。


米蘭迪斯連挫西甲兵


目前丙組一哥米蘭迪斯，喺今屆西盃先後淘汰維拉利爾同桑坦德兩支甲組隊，係8強唯一一支非甲組球隊，前鋒恩菲特暫時仲以5球排西盃射手榜冧巴溫，不過上兩圈腳下敗將都掛住護級，今晚作客喺西甲中游嘅愛斯賓奴好難再爆冷，隨時仲可能因壓力太大崩潰都唔奇！


西盃賽制：


採主客兩回合淘汰制，今輪為8強首回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊將憑作客入球優惠晉級，若加時沒有入球，則需互射12碼決勝。