祖記射爆卡利亞里

猪拉多纳

15/01/2012
文： Katie

自細就好鍾意木村拓哉，《Long Vacation》同《Love Generation》兩套經典日劇更加煲到滾瓜爛熟，最近《TBS》電視台為慶祝60大壽推出台慶猛片《南極大陸》，估唔到擔正嘅木村成39歲人都一樣咁Sharp醒、咁有型，你話如果Katie搵到個咁靚仔嘅Boyfriend就發達咯！^^




唔淨止睇劇，小妹睇波都一樣鍾意睇靚仔，本身亦都好迷祖雲達斯個卡錫，不過唔知佢最近係咪食大咗，塊面成個發水麵包咁款，搞到Katie移情別戀，鍾意咗佢個隊友馬特尼。


新兵波里路隨時候命


今晚「斑馬兵團」會喺主場恭候卡利亞里，倒戈嘅馬特尼自不然係焦點，咪以為佢對住舊會就手下留情，查實呢位靚仔都不知幾專業，上年年頭過檔祖記第1次倒戈就梅開二度，今鋪隨時又再射爆卡利亞里都似。




況且祖雲達斯真係Fit爆，開咧至今未輸過不特止，對上3場意甲主場出擊更加冇失過波，場均至少省對手兩粒，雖然話加利亞雷拉受傷唔出得，但有馬特尼拍住胡仙歷攻堅，另一位新加盟嘅型男波里路亦可以候命，火力梗係信得過啦。


卡利亞里隊長上陣成疑


唔好話Katie係名牌奴隸，卡利亞里近12場聯賽有10場失分，就連最做得嘢嗰件隊長丹尼爾干迪都話狀態不足上陣成疑，憑乜去偷祖雲達斯雞先？再講吖，今晚意甲壓軸大戰係「米蘭打吡」，AC絕對有失分危機，「斑馬兵團」當然要趁機搶3分博重返榜首，戰意唔需要懷疑喎，「讓球主勝」有1.73倍，值得投以信心一票。


Katie推介


祖雲達斯（讓球主勝）

外國長大，半個鬼妹仔，自細因爸爸成日帶朋友返屋企睇波而愛上足球，鍾意睇靚仔但唔會盲目追捧，最緊要係好波。

微博傳情 \(^O^)/

早排Katie勁黑仔，頻頻入醫院不特止，就連屋企張櫈都恰我，累到小妹個八月十五受罪兼且撻到攤攤腰，卒之兩隻腳都扭親，要包到成個忍者咁返工，嗚嗚……><

之不過少少傷又點勒得住Katie吖，所以上星期我就忍痛出征，同班Friends殺咗去日本玩，滑雪、食壽司、買靚衫呢啲指定動作梗唔少得啦，最高興係買到飛入場睇殿堂級搖滾組合Glay嘅迷你演唱會，呢次日本Trip嘅使費雖然好甘，但絕對值得嘅！