藍黑兵團復仇A計劃

猪拉多纳

15/01/2012
文： 巨高

意甲2012年首場重量級對決，由AC米蘭掛牌主場對國際米蘭。兩支米蘭球隊近況不俗，料今場會有一番惡鬥。而對於「藍黑兵團」國米教練雲尼亞里嚟講，今場打吡尤其重要。雲尼亞里近年畀媒體封為「悲情教練」，無論付出幾大努力都得唔到球迷以及老闆信任，為要與悲情脫鈎，今場國米誓必去盡。AC米蘭讓平半，國米受讓兼高水可取下盤。




（now 633及660周一凌晨3時45分直播）




自從莫連奴離開國際米蘭之後，無論由賓尼迪斯、李安納度或者加斯柏連尼執教，國際米蘭對住同市宿敵都未贏過，連盃賽近三場對賽全部輸晒，國米老闆莫拉堤自然不是味兒。而教練雲尼亞里為要討好老闆，有必要喺新一年送上打吡勝利。


雲帥要冧老闆洗悲情


雲尼亞里悲情形象已經深入民心，真係執教邊隊都冇好結果。為令外界對佢改觀，雲帥有意透過打吡戰去「洗底」，畀番球迷一個清新正面嘅形象。




AC米蘭全力爭逐意甲冠軍，鬥志唔使懷疑，不過「紅黑兵團」最近因柏圖事件令氣氛轉差。一路以來，教練阿里基都對柏圖唔多信任，球隊高層加利安尼亦有意斟介泰維斯以代替柏圖，但老闆貝魯斯干尼就覺得，AC賣走22歲柏圖而換入28歲泰維斯係不智做法，正阻止加利安尼再與泰維斯經理人接洽。加上貝老闆女兒芭芭拉，又不斷為愛郎柏圖講好說話，令到貝老闆挽留柏圖嘅立場更見強硬。球隊意向未達一致，難免會影響士氣，打吡戰隨時會失準。


伊巴謙倒戈有情義


另一方面，AC米蘭王牌伊巴謙莫域喺○六至○九年期間曾効力國米，為「藍黑兵團」立下不少汗馬功勞，兩者感情唔差，之後轉投AC除咗喺首度倒戈奉命操刀射入12碼外，跟住喺聯賽交手都食白果，今番對決佢隨時又做「無間道」，對國米「腳」下留情，令AC贏波機會更低。