C朗畀人噓到發火 皇馬碌爆「卡」出氣

猪拉多纳

14/01/2012
文： 查理阿蛋

雖然皇馬仲未擺脫畀巴塞食住嘅陰霾，但就專搵弱隊出氣，對親「非巴塞球隊」都有穩定發揮，近10戰作客全勝嘅佢哋今晚西甲作客馬略卡，小妹相信近排腹背受敵嘅C朗會領軍大炒主隊出番啖氣，捧1.58倍「讓球客勝」啦！（now632台周日凌晨3:00直播）


C朗對親弱旅勁入波


皇馬球王C朗今仗絕對係馬略卡心腹大患！事關佢對親巴塞都隱形，令呢位射手近排經常畀自己球迷噓爆，之前對CF格蘭納達場西甲入波都面燶燶唔慶祝，近期又畀狀態大勇嘅賓施馬搶盡風頭，C朗今場仲唔嚟個大爆發爭番啖氣咩？


馬略卡教頭怕怕


睇番紀錄，C朗今季對薩拉戈薩、華歷簡奴及奧沙辛拿等較弱嘅球隊都大演帽子戲法，今仗必定乘勢糟質馬略卡，搞到主隊教練卡柏路斯擔驚受怕：「希望C朗唔好搵我哋出氣啦！」




雖然皇馬鬥馬略卡後短短3日，就喺西班牙盃8強迎戰剋星巴塞，小妹預計莫連奴今仗會收起部分主將留力，不過陣中仲有一班星級副選好似卡卡、荷西卡利祖等，尤其係趁住基迪拉受傷，艾比路亞就嚟停賽，好努力咁爭上位嘅法比奧干查奧肯定搏甩髀。馬略卡上場西班牙盃雖以6:1大炒皇蘇晉級，但皇馬完全係另一層次嘅對手，今仗想輸少球都難！