FC燕豪芬成功增兵要「讓主」

猪拉多纳

13/01/2012
文： 朱楓

救星到啦！今晚荷乙重開，其中FC燕豪芬會喺主場對靴蒙特。上年尾鬧後衞荒嘅FC燕豪芬喺歇冬期間終於簽得前加納國腳艾歷艾度，防線穩陣番，對住下游球隊靴蒙特，要開2.55倍「讓球主勝」話咁易啦！（開賽時間：周六凌晨3:00）


靴蒙特歇冬前4連敗


被喻為今季荷乙升班熱門嘅FC燕豪芬，自去年12月起表現開始下滑，4戰僅得1勝1和2負，主因係後衞迪布克重傷要長抖。為解決問題，呢支荷乙勁旅喺1月轉會窗重開後，就簽得前加納國腳艾歷艾度。呢位曾効力布魯日同荷甲燕豪芬嘅33歲後衞，早前都有隨球隊去土耳其集訓，而且仲頻頻喺熱身賽上陣，同一班新隊友已建立一定默契，以佢嘅卡士，今晚應該可以令FC燕豪芬冇後顧之憂，放心進攻。




暫時喺荷乙18隊波中排第13嘅靴蒙特，歇冬前狀態奇差錄得4連敗，可惜礙於財力有限無法增兵，今場根本冇反彈本錢，作客矢志升班嘅FC燕豪芬，輸兩粒真係最低消費！