巴勒莫贏「玻」響新年頭炮

猪拉多纳

08/01/2012
文： 翁文成



巴勒莫Vs拿玻里


新一年新開始，巴勒莫新帥梅迪今晚首度喺主場領軍，對住作客唔多掂嘅拿玻里有望打響2012年頭炮！最重要係「傻豹」主場鬥拿玻里已經連開6口W，咁好路冇理由唔追啩？受讓平半梗係要下盤啦！（now633及660台、中央5台周一凌晨3:45直播）




巴勒莫喺聖誕前炒咗曼基亞並改由梅迪接手，佢老人家上月底首度領軍即刻有球員見紅，但依然以2:2賽和路華拿，算係交足貨。中場伊利錫今晚要停賽，好彩有「新柏斯托尼」之稱嘅法蘭高華斯基斯同前鋒麥美迪兩位生力軍都可以披甲，火力令人憧憬。


拿玻里作客腳軟


賽前「傻豹」會長森柏連尼估埋波膽，預測會贏拿玻里1:0。無他嘅，拿玻里有好波之人拿維斯打柴，啱啱以1,050萬歐元來投嘅智利射手伊度亞度華加斯又未出得，球隊近4場意甲作客又全部失分，難怪森柏連尼咁有信心。況且拿玻里對上6次正式比賽造訪巴勒莫輸晒，信攤路梗係捧「傻豹」。