曼市大戰第三擊 紅魔鬼上門尋仇

猪拉多纳

08/01/2012
文： 樂比堅尼

英格蘭足總盃第三圈今晚上演勁爆重頭戲，曼城主場對曼聯。「紅魔鬼」上次喺奧脫福慘敗畀曼城一比六，被視為奇恥大辱，兩隊血海深仇，今次再度碰頭，肯定打甩髀，預計入球唔會少，樂比仔推介大盤。（now 671及672周日晚9時直播）




兩隊今季已經碰頭兩次都開大，社區盾曼聯反勝三比二，而聯賽曼城作客則大勝六比一，兩場波都踢到飛沙劈石，精彩到暈，由於兩隊面子攸關，要贏仲要威，所以唔會大踢防守足球，作為投X者大可慳番度邊隊贏，買定花生睇入球騷好過。


曼聯為面子搏盡


事實上，兩隊對今場波都相當重視，因為兩隊於歐聯出局後，足總盃係佢哋補償好機會，尤其係曼聯聯賽連輸兩場後，目前落後畀曼城三分，佢哋聯賽盃已經出咗局，如果連足總盃都輸埋，隨時四大皆空，真係乜面都冇晒，你話今場有乜可能唔搏先得㗎！




睇番英國方面嘅消息，雖然經過頻密嘅快車賽程，但兩隊都打算強陣出擊，曼城除巴洛迪利受傷，巴利停賽，托尼兄弟踢非洲國家盃外，其他主力均可上陣，而曼聯亦只係得長期傷兵尼曼查維迪、艾舒利楊格及基斯史摩寧等人缺陣，既然兩軍陣容今場均有誠意，樂比仔認為開大係好合理嘅期望，1.85倍非常超值。


曼城主場火力勁


再睇番兩隊數據，兩隊係英超入波最多嘅球隊，曼城主場亦極旺大，今季聯賽主場十仗有八場開到大，試問數據咁強點可以唔捧！