紅軍斷箭唔識打「鵲」

猪拉多纳

30/12/2011
文： 朱楓

今晚英超將上演經典對決，由利物浦主場大戰紐卡素。近年主場剋死紐記嘅紅軍近排黑過墨斗，啱啱仲肯定有射手蘇亞雷斯坐波監，相反「喜鵲」紐卡素上場有米克威廉臣復出鎮守中路後明顯穩陣咗好多，前線又有當弗射手丹巴巴亞，受讓1球「讓球客勝」有2.57倍博得過架！（有線200及300、廣東體育周六凌晨3:45直播）


利物浦場場中柱


90年代開始睇英超嘅球迷，相信一定記得當年利物浦對紐卡素幾場大戰，當中96同97年，利物浦連續兩次喺主場贏「喜鵲」4:3嘅賽事，更被譽為經典中嘅經典。兩隊今晚交手，肯定會勾起唔少球迷回憶。




睇番往績，原來紅軍已連續6次主場贏紐卡素，但今晚睇嚟係時候斷纜，事關利物浦近排黑過墨斗，幾乎每場波都中柱中楣唔在講，近排惡運仲變本加厲，先有查理阿當12碼宴客後再擺烏龍、上場對布力般又有前鋒安祖卡路爾離門3碼攻門不入；首席射手蘇亞雷斯仲突然喺今仗賽前被英足總罰停賽1場，安祖卡路爾冇咗「哨牙蘇」掩護，面對舊隊友睇怕仲難搵食。


紐卡素丹巴巴亞弗爆


紐卡素上場終於終止頹勢，作客贏保頓2:0，結束6場不勝劣績。喜鵲重返勝軌，中堅米克威廉臣及時復出幫助唔細，雖則佢卡士一般，但勝在位置感佳，拍住高洛仙尼，成功互補不足。賽前領隊柏杜接受訪問，承認隨住斟索察射手邁加失敗，明年1月唔會再買前鋒，不過朱楓認為現階段冇太大影響，事關嚟緊1月將要代表塞內加爾打非國盃嘅丹巴巴亞近排弗到爆，已經累積射入14球，加上中場丹高士寧今場刑滿，另一中場主場迪奧迪又重申喺紐記好開心無意離隊，士氣咁好作客黑到爆嘅利物浦，真係有本錢偷雞o架！


橫數千軍


紅軍連開7場細




‧聯賽主場3勝6和，勝率僅33%。

‧近8場4勝3和1負，連續7場開細。

喜鵲「讓球」贏盤率高

‧目前英超讓球主客和贏盤率僅次曼城，錄10贏3和5輸。

‧近6次作客利物浦全敗，對上5次全食白果。