水手拚「死」保社長飯碗

猪拉多纳

29/12/2011
文： 九叔

橫濱水手今日响國立競技場出擊，唔只係同京都不死鳥爭天皇盃決賽席位咁簡單，仲關係佢哋個社長嘉悅朗有冇得撈，水手全隊上下目標一致瞄準呢項錦標，1.6倍主勝抵玩。（now711台及有線148周四下午2:00直播）


誓捧天皇盃攞亞冠席位


日職收晒咧，日本4個出年踢亞冠盃嘅席位，已經畀日職前三名攞咗，依家剩低唯一一張入場券，就係屬於天皇盃冠軍。今季以進軍亞冠為目標嘅水手，可以達成心願嘅方法，就係稱霸天皇盃，難怪佢哋個社長响職賽主場收爐戰賽後，咬牙切齒叫班球員加把勁，一定要捧走天皇盃殺入亞冠，佢仲話自己嘅去留，完全睇呢鋪。




其實水手隊波士氣唔曳，收咧後唔少日職隊又易帥又換球員，動作非常大，唯獨呢支傳統勁旅比較低調，監督木村和司亦獲得留用，班球員自然唔想衰收尾，事關社長落台嘅話，新人事新作風可能又有大地震，有幾多人保得住飯碗都冇人知。




水手有鬥心，對手不死鳥都一樣，佢哋賽前講明唔輸得，但就承認自己作為一支日乙波，實力係及唔上水手嘅，何況不死鳥個頭號射手宮吉拓實近況跌Watt，中場鄭又榮坐波監，對住有中村俊輔、中澤佑二呢啲前國腳壓陣嘅水手，只能夠輸少當贏，博主勝啦。