史雲斯熄火普細歡騰

猪拉多纳

27/12/2011
文： 麥馬拿仁

今晚英超快車升班球隊對撼，史雲斯主場鬥昆士柏流浪。去季兩軍仍屬英冠兵，雙方都熟知彼此虛實，兩位領隊必可作針對性部署。史軍做波勝一籌，但近兩仗死火冇波入；昆士柏三連敗今場作客死守攞到一分都收貨，雙方近六次對賽五次開細，拿仁今場一於追多鋪。（有線200及300台周三凌晨１時直播）




本季英超升班球隊表現唔錯，其中史雲斯更令人耳目一新，雖然陣中冇星級球員在陣，但領隊羅渣士有料到，球員個個都識用波，後防冇話大腳上，前中後三線都擅用地波組織。


史軍雙箭平庸


不過史軍前鋒如丹尼格拉咸、史葛冼佳亞等始終質素有限，故本季十七場聯賽入得十六球。但佢哋後防不俗，失球只有廿一球，故本季有六成賽事開細。睇番近績，史雲斯近七場就有六場開細。




昆士柏流浪去季橫掃英冠，但升班後表現不及史雲斯同諾域治，近三仗全數敗陣。球隊現時離降班區只有兩分差距，加上下場就作客阿仙奴，今場搶分意欲極高，但進攻主力胡禮菲臘斯上陣成疑下，昆士柏入波板斧的確唔多，拿仁預期今場戰情將緊張而不精彩，捧1.68倍入球細啱數。