施捷斯尼爭氣宣言 誓要壓過同城宿敵熱刺

猪拉多纳

21/12/2011


同樣嚟自倫敦嘅阿仙奴同熱刺向來勢成水火，近年熱刺更成為兵工廠主要競爭對手。眼見爭標無望，阿仙奴門將施捷斯尼就發表「爭氣宣言」，表示會以「壓過熱刺」為今季主要目標！


高薪後備艾沙維1月走人


阿仙奴上仗敗走曼城後，領隊雲格曾暗示奪冠希望渺茫，加上被少踢一場嘅死敵熱刺拋離5分，表現神勇嘅門將施捷斯尼就決意「為啖氣」而戰：「作為阿仙奴球員，我嘅主要目標係壓過熱刺，我對我哋絕對有信心！」佢更為一眾「廠仔」大打強心針：「雖然佢哋依家狀態唔錯，不過最後一定會有所下滑，我相信我哋最終會比佢哋更強。」




雖然施捷斯尼好有火，都未必幫到慘變「雪人」嘅艾沙維。英國《每日郵報》爆料，指阿仙奴考慮响1月放走淪為高薪後備嘅「沙皇」，並希望以多蒙特嘅馬里奧葛斯作為其替補，據報艾沙維有可能回歸俄羅斯勁旅辛尼特。