副選爭上位皇馬「-2」照殺

猪拉多纳

20/12/2011
文： 郭球奇

首回合贏兩粒嘅皇馬，今晚喺西班牙盃32強次回合主場對丙組仔邦弗拉甸拿，預計今戰有奧斯爾等星級後備撐場，仍然有力大炒對手，就算讓兩球「讓球主勝」得1.4倍仍值得熱捧！（now632台周三凌晨3:00直播）




首回合皇馬作客邦弗拉甸拿，教練莫連奴為畀C朗發洩喺「國家打吡」輸波嘅不忿，結果派遣呢位葡萄牙球星擔正，雖則喺下半場中段有中堅艾比奧爾被逐，最後都輕取2:0。


奧斯爾擔正唔放過丙組仔


皇馬今仗有後衞沙治奧拉莫斯因傷缺陣，艾比奧爾亦要停賽，希古恩、卡卡、迪馬利亞同馬些路4名南美兵更加返咗家鄉提早放聖誕假，而且首回合有兩粒在手，諗都諗到皇馬今晚返主場作戰，實會派唔少副選上陣。不過「銀河艦隊」勝在後備都超晒班，派奧斯爾、紐尼沙軒同咸美艾天托普仍夠殺，特別係奧斯爾，最近被荷西卡利祖搶去正選，上場對西維爾坐足90分鐘冷板，假如今晚有得落場，仲唔搵邦弗拉甸拿祭旗證身價咩？


西盃賽制：


採主客兩回合淘汰制，今輪為32強次回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊將憑作客入球優惠晉級，若加時沒有入球，則需互射12碼決勝。