AC碌「卡」派聖誕禮物

猪拉多纳

20/12/2011
文： 朱楓

乜嘢係教練最想收嘅聖誕禮物？之唔係續約囉！《米蘭新聞網》賽前爆料，指教練阿里基假如今晚成功帶領AC米蘭喺意甲作客擊敗卡利亞里，將獲提前續約，適逢卡利亞里係佢母會，上季兩度交手都贏晒，明顯睇通對手條路，客W有1.54倍真係咪錯過呀！（now633及660台周三凌晨3:45直播）


倒戈母會全勝熟晒路


季初出閘脫腳嘅AC米蘭，近排重拾上季奪標嘅霸氣，自10月中旬後，聯賽10場不敗狂擸26分，教練阿里基當然居功至偉。AC副主席加利安尼尋晚都證實即將同佢續約：「我哋已經達成協議，將同阿里基續約到2014年，雖然我哋仲未正式簽約。」




不過《米蘭新聞網》爆料，假如阿里基今晚成功帶領AC擊敗卡利亞里，有望喺聖誕節前成功續約，若然失分，續約就會推遲到年底嘅杜拜冬訓期間，甚至拖延到下年1月頭，為免夜長夢多安心過聖誕，阿里基今晚梗係會吩咐球員加多兩錢肉緊。




其實阿里基未掌管AC米蘭帥印之前，教過卡利亞里兩季，上季佢兩度帶領「紅黑兵團」倒戈母會，結果兩戰全勝，加埋入咗5球只失1球，擺到明睇通母會條路，再加上後衞安東連尼、森保達同門將艾比亞迪近日都已復操，今晚有機會復出，配合已連續4場聯賽射入12碼嘅伊巴謙莫域同大勇中場洛斯連奴，AC呢場擺到明為3分而戰。


卡利亞里勁跌Watt


自從季初頭5場聯賽取得3勝後，卡利亞里近況全面回落，連同意大利盃，對上11場比賽只贏過1場咁大把，前仗對帕爾馬更有中場主力丹尼爾干迪膝部受傷，證實要到下年1月中先至復出，結果上場作客基爾禾連蛋都破唔到淨輸0:2，可以睇出卡利亞里冇咗干迪影響真係好大，再加上今場又有另一中場比安甸尼停賽，睇怕今場就算有卡利亞里會長口中值1億歐元嘅比利時新星尼恩高蘭喺中場孭飛，對住人強馬壯嘅AC都係凶多吉少！


橫數千軍


卡利亞里半場旺開0:0

‧近8場1勝2和5負，有5場半場開0:0。

‧上季兩度交手全敗，入1球失5球。

AC場場例牌入2球

‧近8場4勝3和1負，有7場至少入2球。

‧伊巴謙莫域已連續4場聯賽射入12碼。