利物浦炒唔起維拉

猪拉多纳

18/12/2011
文： 查理阿蛋

今晚英超阿士東維拉主場迎戰利物浦，「紅軍」人腳雖然高一班，不過佢哋今季經常欠缺埋門一腳，要全取3分唔難，但似乎都係小勝居多，小妹貪心啲要3.45倍「讓球和」。（有線200、300及廣東體育周日晚10:05直播）




無論係睇人腳定往績，利物浦都一面倒佔優，可惜佢哋今季嘅門前把握力真係差到冇人有，大量埋門機會，居然只有8.9%可以轉化為入球，係全英超「最大嘥」球隊！好彩「紅軍」防守力冠絕聯賽（15場只失13球），中場控制力亦強，前線仲有麥斯洛迪古斯、蘇亞雷斯等狂攻，今仗要爭取小勝並唔係難事。


維拉射手艾邦拉荷停賽


倒戈嘅中場達寧今季雖多次射中柱慘變「柱男」，賽前仍獲領隊杜格利殊力讚，佢亦表示：「我好快就會入到波！」雖然舊隊友馬克艾拜頓話對迎戰利物浦充滿信心，仲話要畀達寧知「唔係冇咗佢唔得」，不過佢哋有射手艾邦拉荷停賽，首席門將基雲仲養緊傷，點都唔似有分落袋。