紅魔煲魚生粥 慰勞用命將「士」

猪拉多纳

18/12/2011
文： 郭球奇

雖然近排爆發傷兵潮，不過曼聯出晒名打整體，冇話冇咗邊個唔得，更何況今晚喺英超只係作客昆士柏流浪，球奇睇好「紅魔鬼」可以複製往績，再煲魚生粥開出3.45倍「讓球和」！（有線200及300周日晚8:00直播）


昆士柏流浪 Vs 曼聯


曼聯近排認真黑仔，繼歐聯出局後，仲成為目前英超十字軍最嚴重球隊，繼前鋒奧雲、貝碧托夫、查維亞靴南迪斯、中場湯卡華利、路爾斯安達臣、後衞尼曼查維迪同達施華兄弟後，中場費查又話因為怪病可能要提早收咧。


打慣整體戰無懼傷兵潮


不過曼聯喺上場英超仍然主場大勝狼隊4:1，再次證明紅魔嘅整體實力仲係咁Work，難怪養緊傷嘅曼聯隊長尼曼查維迪近日表示，有信心喺下年新年超越曼城上榜首，今晚作客昆士柏，贏一粒應該毫無難度。


昆士柏安頓費迪南缺陣


今季英超3支升班球隊表現都好搶鏡，特別喺主場，昆士柏流浪就試過揮低車路士，對住億萬大軍曼城都係僅輸2:3，盛傳領隊禾諾克計劃明年1月增兵，目標直指熱刺前鋒柏夫里約真高、曼城中場尼祖迪莊同韋斯咸中堅湯堅斯，不過今晚主場對曼聯始終唔樂觀，一來正選中堅安頓費迪南好大機會缺陣，射手希古臣亦只係啱啱好番，未必擔正，而且近6次對曼聯輸足5次，當中3次僅輸1球，今鋪隨時又飲恨！


曼聯近6次對昆士柏戰績


日期 戰果




08/11/11 曼聯 1:0 昆士柏流浪

96/03/16 昆士柏流浪 1:1 曼聯

95/12/30 曼聯 2:1 昆士柏流浪

95/03/12 曼聯 2:0 昆士柏流浪

94/12/10 昆士柏流浪 2:3 曼聯

94/08/20 曼聯 2:0 昆士柏流浪