車仔要奪標先要贏老細

猪拉多纳

18/12/2011
文： 黃興桂

有富豪老細有辣有唔辣，好處當然係後台硬買人易過借火，但有錢佬唔係咁易湊，要佢老人家開心過癮，領隊無論買人抑或戰術運用，或多或少都受到影響同限制。好似車仔老闆阿布拉莫域，一直都想球隊踢進攻足球，而且又鍾情收購天價前鋒，卒之嘥錢之餘，領隊保亞斯亦左右做人難。




阿布於○三年成功收購車仔，豪花之後班波順風順水，而佢雄心亦愈來愈強，目標係問鼎歐聯，戰術要賞心悅目，仲要有球星壓陣。○六年佢斥巨資3,000萬鎊購入舒夫真高，最後蝕到入肉；今年初再發噩夢，使5,000萬鎊買入費蘭度托利斯，但費托變「廢托」，係車仔近十二個月來戰績麻麻嘅其中一個原因。


保亞斯為討好阿布「焗攻」


另外，新帥保亞斯為討好老細，今季亦銳意大打進攻足球，想複製佢近季帶領波圖時代嘅成功。其中一個做法就係將一條防線谷上，原意係想壓住對手嚟打，但一班後防根本唔適應，係佢哋本季主場輸畀利物浦及阿仙奴嘅主因。本身歐聯對華倫西亞一仗，保帥已覺悟將防線縮番後，點知聯賽對曼城又故技重施，所以一開波就失波。其實如非球證唔畀曼城十二碼，車仔能否反勝實成疑問。




曼城被破不敗身後，前列球隊又重燃爭標希望，而曼市雙雄歐聯出局後，英超爭逐肯定更加激烈，大家要睇實呢場好戲，唔好走開呀！




金句：車仔八年來8,000萬鎊的懊惱（Oh No！）