伯明翰爭出線夠拚「博」

猪拉多纳

15/12/2011
文： 亨格比利

今晚繼續有歐霸盃做主菜，其中H組嘅英冠球隊伯明翰會喺主場恭候斯洛文尼亞「一哥」馬里博爾。剛啱復甦嘅伯明翰為爭出線非勝不可，計人腳同鬥心點都比已經篤定出局嘅馬里博爾秤先，2.15倍「讓球主勝」捧得過。（有線64及204周五凌晨4:05直播）




先講H組出線形勢，布拉加已肯定躋身32強，揸住10分嘅布魯日就會同有7分喺手嘅伯明翰爭奪餘下一個出線資格，由於雙方對賽往績以伯明翰佔優，所以一旦同分就會由「阿伯」出線。伯明翰今晚要砌低馬里博爾之餘，仲要望另邊廂嘅布拉加擊敗布魯日先可以出線，形勢都幾被動，所以惟有做好本分，以全取3分為目標。


馬里博爾出局隨時揸流


呢支英冠隊伍上場聯賽反勝唐卡士打，終止4場不勝頹勢，領隊曉頓指全班球員嘅信心都返晒嚟。況且馬龍京治同基斯活特呢對箭頭今季如魚得水，至今已合力炮製18個「士哥」，鋒力絕對有保證，既然首循環馬里博爾主場都要輸畀伯明翰，家陣出咗局仲邊有心情同你搏命吖，造訪「阿伯」隨時輸鑊勁都似！