巴塞人情味贏晒

猪拉多纳

15/12/2011
文： Wendy

巴塞隆拿班球員上周末踢完國家打吡，話咁快就飛咗去日本為世冠盃作準備。贏咗國家打吡後，「地上最強」地位進一步肯定，好自然地，大家都期望佢哋贏埋呢項錦標。




巴塞到達練習場後，主辦單位請四十個受災地區學生去參觀，一來等班小朋友感受球星風采，二來亦作為對災民嘅一份支持，認真有人情味。今晚巴塞會同亞洲冠軍艾薩德踢四強戰，呢隊卡塔爾球隊喺國內好有名氣，曾經攞過十二次聯賽冠軍，連羅馬里奧喺○三年亦都短暫効力過，可惜依家人腳質素就唔係世界級。佢哋喺上圈對住突尼西亞艾斯柏蘭斯只係小勝二比一，今晚要爆冷真係天方夜譚。




巴塞今次多位球星都有隨隊，包括一到場就有數千日本少女圍住影相嘅美斯，以咁嘅人腳出戰，贏唔到會好羞家，後衞碧基亦充滿信心咁話：「贏呢隻盃係我哋分內事，如果贏唔到，邊有面目返去西班牙喎！」




問題係客勝只得1.01倍，「讓球主客和」開[-3]，要淨勝四球先開到上盤，睇番咁多屆世冠盃四強紀錄，就只得○六年巴塞贏過墨西哥阿美利加四比○算最大比數，不過當屆巴塞最終喺決賽輸畀國際體育會喎！


「讓球和」有迹可尋


呢場我寧願扒冷揀「讓球和」，望巴塞淨勝三球，第一貪好分頭，第二馬會曾多次開出好懸殊嘅「讓球主客和」盤口，同樣亦多次開出「讓球和」，例如歐國盃外圍賽強隊對弱旅時都成日開得出，上屆四強歐洲代表國際米蘭對南韓球隊城南一和亦係贏三球，大家一於邊睇直播邊收錢啦！