蒙特雷贏牌面質「素」

猪拉多纳

11/12/2011
文： 走肖

世冠盃複賽今日打孖上，當中日本霸主柏雷素爾遇上墨西哥勁旅蒙特雷，平手都未必有着數，雖然柏雷素爾係出爐日職冠軍，但佢哋喺名古屋比賽冇咩粉絲撐場，冇厘氣勢唔似惡得出樣，何況蒙特雷有幾件「歐洲回流貨」壓陣，牌面唔曳，有條件贏波躋身4強同山度士爭入決賽。（有線61及201周日晚6:30直播）




柏雷素爾「主場」照輸人氣




東道主柏雷素爾憑射手田中順也同前鋒工藤壯人嘅入球，日前喺資格賽以2:0淘汰大洋洲魚腩奧克蘭，不過入選今季日職最佳陣容嘅右閘酒井宏樹喺場波整傷左膝，雖然尋日都有輕鬆操練，好可能要由中場水野晃樹移後頂上。更弊嘅係，柏雷素爾人氣唔多夠，對住奧克蘭得18,754個球迷撐場，相信今場亦唔會有太多粉絲聲援，好難有超水準演出。




另一方面，蒙特雷係今屆中北美洲冠軍球會盃冠軍，而且拎過4次墨西哥聯賽錦標，牌面絕對唔弱，仲有幾位曾經喺歐洲搵食嘅球員壓陣，包括智利首席射手漢拔圖蘇亞素、阿根廷國腳級前鋒施薩迪加度，同埋曾踢過兩屆世盃決賽嘅墨西哥後衞奧蘇里奧，佢哋分別踢過薩拉戈薩、里昂同史特加，大賽經驗豐富，平手盤1.88倍客W仲唔快啲「柏」板！


世冠盃賽制


今輪為複賽，賽事以一場過分勝負，若法定時間內打成平手，需加時作賽，再和則互射12碼決勝。