艾斯柏蘭斯有料到贏德

猪拉多纳

11/12/2011
文： 法比加輝

世冠盃複賽頭場有非洲代表突尼西亞球會艾斯柏蘭斯，迎戰亞洲代表卡塔爾艾薩德。「有米球會」艾薩德自從爆冷奪得亞冠盃之後，成班波就好似小學生考完試準備放暑假咁，踢波冇晒鬥心，令近績慘不忍睹！艾薩德狀態差信唔過，捧讓平半嘅艾斯柏蘭斯。（有線61及201台周日下午3時直播）


艾薩德捧完亞冠心散


卡塔爾球會近年使唔少錢去買球星，目標就係想贏得亞冠盃，結果艾薩德今季終於做到，上月爆冷擊敗全北汽車奪冠。事實上對於佢哋嚟講，奪亞冠確係夢想成真，所以球隊奪標後難免歡天喜地，球隊上下至今仍沉醉於勝利當中，自然嚴重影響表現，近三仗全敗。




再者，艾薩德實在太依賴星級外援比赫積、尼安及卡達基達，幾位非洲兵可以憑身材優勢喺亞洲呼風喚雨，但如今要撞番非洲兵艾斯柏蘭斯，相信難以再佔優勢。艾斯柏蘭斯坐擁唔少突尼西亞國腳，而且陣中亦有馬里及加納等國腳坐鎮，照秤點都好過艾薩德，所以加輝覺得小讓平半上盤值博。