蒙特雷叉足電衝四強

猪拉多纳

11/12/2011
文： 蘇豪

世冠盃複賽，日本球隊柏雷素爾於主場豐田球場迎戰墨西哥勁旅蒙特雷。柏雷素爾剛奇迹地勇奪日職冠軍，抖咗幾日即出戰世冠盃，球員搏得咁盡，上周四資格賽贏奧克蘭已見疲態，八日內連踢三場硬仗難頂，反觀對手養精蓄銳，平手捧蒙特雷。（有線61及201台周日晚6時30分直播）




作為東道主嘅柏雷素爾以升班馬身份勇奪日職冠軍，本身已經係一個奇迹，雖然教練尼仙奴話要延續神話，攞埋世冠盃，但大家都知道呢個只係一廂情願嘅諗法，柏雷素爾莫講話要挑戰冠軍，連蒙特雷呢關亦未必過到。


蒙軍中冠盃已顯實力


事實上，柏雷素爾今季嘅成功，某程度上有賴於兩名巴西外援佐治韋拿及李安度杜明基斯，其他球員雖然表現落力，但級數唔係特別高，只要凍結到兩名巴西外援，柏雷素爾即威力大減，況且佢哋嘅小組踢法，同南美及中美洲球隊相似，啱晒蒙特雷合尺。




蒙特雷名氣唔大，但唔代表實力弱，佢哋係一支踢法幼細，而且防守相當穩健嘅球隊，陣中有漢拔圖蘇亞素、奧蘇里奧等曾於歐洲搵食嘅球員，佢哋喺中北美洲冠軍盃幾乎打遍無敵手，應付盃賽係有一手，墨西哥球隊喺世冠盃向來有唔錯表現，七屆賽事有四屆打入四強，今仗有力擊敗主隊，同山度士爭入決賽。