黑貓斬件布力般

猪拉多纳

11/12/2011
文： 麥馬拿仁

「黑貓」新特蘭開季戰績曳，再輸落去降班都似，貓有九命都唔掂啦，老細昆尼早前手起刀落怒炒布魯士後，邀得「大魔術師」奧尼爾出山擔任新帥。此名前李斯特城、些路迪、阿士東維拉教頭，擅用蔗渣價錢煮出燒鵝味道，今晚處子督師主場鬥布力般流浪，奧尼爾魔術棒一揮、黑貓即變雄獅，誓將布力般斬到一截截，咁仲唔捧新特蘭主W！（有線200及300台周日晚9時30分直播）




奧尼爾今年五十九歲，作風一向低調，所教球隊都實而不華，但每每唔聲唔聲嚇你一驚，李斯特城夠碎料喇啩，點知喺大師魔法下，兩奪英聯盃冠軍；些路迪可以當格拉斯哥流浪冇到，三奪蘇超錦標、維拉更幾乎成功衝擊歐聯席位，難怪連費格遜都大讚佢有料，亦一度被視為英格蘭國家隊領隊人選。




自去年八月離開維拉後，奧尼爾抖咗超過一年；眼見兒時愛隊新特蘭目前水深火熱，「大魔術師」終靜極思動，披上燕尾禮服、摷番支魔術棒，再闖球壇創造奇迹。奧尼爾向傳媒話，佢期望有朝一日將新特蘭打造成另一支巴塞隆拿；不過現階段無遮無扇，佢惟有盡用隊內資源幫「黑貓」止血。


神奇領隊幫新特蘭止血


「正所謂限米煮限飯，新特蘭現時將奉行實用主義，首先係要重新建立球員信心，冇信心又點贏波先？第二就係要賓特拿打前啲，多啲殺入禁區，佢依家唔係踢緊阿仙奴，新特蘭唔會攞到咁多波做，佢要盡快適應轉變。第三就要練好死球，無論進攻同防守都要。只要我哋贏番兩、三場波，就可扭轉形勢。」一聽大師高見，就知佢有料到喇！




以波論波，新特蘭人腳唔曳，今場於「新帥效應」下應可大打翻身戰，布力般中場尼桑斯停賽，馬田奧臣、賴恩尼爾遜同魯賓洛堅拿上陣成疑，本季作客又未贏過，啱晒奧尼爾玩刀鋸魔術，將佢分開一件件。一於捧奧尼爾場揀主W！


魔法大全


李斯特城時期 95年12月開始執教，當季就帶領「狐狸」升英超，97及2000年兩奪英聯盃，99年亦殺入決賽。喺奧尼爾麾下，「狐狸」37年來首次衝出英格蘭，征戰歐洲足協盃。

些路迪時期 2000年首次帶隊鬥格拉斯哥流浪，即贏六比二，首季即做「蘇超三冠王」。03年殺入歐洲足協盃決賽，鬥至加時先不敵波圖，屈居亞軍。

阿士東維拉時期 06年執教首季，維拉連跳五級取得聯賽十一名，之後球隊成實力分子，多次衝擊歐聯席位。一連三季維拉都做「英超六哥」，每季分數都有增加。10年2月，維拉殺入聯賽盃決賽，惜不敵曼聯。