辛尼迪停賽國米「費」到爆

猪拉多纳

10/12/2011
文： 走肖

最近睇財經，幾乎每日都講緊歐洲國家被調低主權評級，其實今季球壇都有隊波評級跌到近乎破產，呢隊波就係低處未見低嘅國際米蘭，盲目追捧隨時輸到喊。今晚國米喺意甲主場對費倫天拿，更有加隊長辛尼迪停賽，防線開大窿唔似W得出，吼實費倫1.9倍「讓球客勝」好過。（開賽時間：周日凌晨3:45）




國米開季冇耐已經炒咗新教練加斯柏連尼，點知雲尼亞里接手都收拾唔到殘局，之前叫做有啲起色，又連續輸畀烏甸尼斯同莫斯科中央陸軍，而且傷兵問題嚴重，射手科蘭、中場史奈達、菲臘比古天奴、蒙達利、後衞盧斯奧、馬爾干同捷禾全部未好番，原本已經頭痕，呢場仲有作為精神領袖嘅隊長辛尼迪坐波監，今季國米踢到失晒信心，冇埋辛尼迪令人更擔心。


費倫祖維迪拍基拿甸奴可信


費倫就唔同啦，起碼近6場有3勝1和2負，更重要係傷兵情況得到紓緩，前線最具創造力嘅前鋒祖維迪，更喺上周傷愈兼射入12碼，有佢拍住射手基拿甸奴，火力點都好過冇咗伊度奧後，踢到一盤散沙嘅評級下調藍黑兵團，何況費倫連盃賽近8次作客國米全敗，要破宿命踢爭氣波，今場係最好機會，相信費倫會踢得更加肉緊搶分。