皇馬秒殺巴塞

猪拉多纳

10/12/2011
文： 鄭少偉

嗚~嘩~全宇宙球迷熱切期待、等到頸都長埋嘅西班牙國家打吡終於上演喇，「銀河艦隊」皇家馬德里喺巴拿貝球場，迎戰宿敵「地上最強」巴塞隆拿，傳統上兩隊碰頭勝負嘅重要性更甚於聯賽冠軍，所以必定踢到飛沙劈石，火藥味濃好睇過戲！我同班老友傾話撐邊隊都拗到面紅耳熱，「亨利」今晚撐皇馬2.15倍主W！（now632台及廣東體育周日清晨5:00直播）


今排433突擊煞食


「亨利」講堅o架！真係同班老友傾呢場波傾到爭啲反面咁滯，原因係老友A信數據，話巴塞就算作客都唔會輸畀皇馬，話皇馬近3年無論主場定作客，喺法定時間都未贏過巴塞喎。但「亨利」就不嬲都淨係信狀態，點都唔信已經15連W嘅皇馬，會喺自己地頭輸畀巴塞。就係咁你一言、我一語搞到大家躁晒。不過冇問題嘅，大家識咗咁多年好快就會Friend番，但「亨利」預咗到睇波時又會再鬥過嘴！




「亨利」對皇馬咁有信心，主因係佢哋有個堅有料嘅教練，莫連奴之前帶波圖、車仔同國米都贏到聯賽冠軍，唔到你唔服o架！佢老哥吸收上季經驗後，今年皇馬畀佢調教到攻守兼備之餘，仲將一班超級巨星徹底馴服，乖乖哋喺場上執行佢嘅戰術，有幾招都好煞食o架！


體能提升中場爭餐飽


其中最大殺着就係「神速反擊」，記得之前聯賽佢哋對維拉利爾有一次反擊，用咗12秒就由後場轉守為攻入埋波。個場入面有咁多人，唔好話傳球同射門，淨係要十零秒由後場跑去對面龍門都未必得啦！唔係夾慣夾熟根本唔會做到，呢一招相信係莫帥賴咗幾次嘢畀巴塞後，鑽研出嚟新殺着，今場佢哋話要踢433，隨時就靠呢招喺一瞬間「秒殺」巴塞！




仲有呀，皇馬班球員今季體能都有顯著提升，配合埋莫連奴一向崇尚嘅壓迫打法，同巴塞條黃金中場線鬥搶鬥燒，應該可以達至玉石俱焚嘅效果，到時咪睇邊個嘅前鋒把握力高啲囉！我就信C朗同賓施馬多過美斯拍韋拿喇！一於追皇馬喺主場開出16連勝！


橫數千軍


皇馬主場王6戰全勝

‧已15連勝，追平球會紀錄。

‧聯賽主場王，6戰全勝。

‧C朗與希古恩共入29球，為西甲最強進攻組合。

巴塞近戰旺開大

‧近8戰6勝1和1負，6場開大。

‧法定時間近7次對賽3勝4和。

‧聯賽15戰失7球西甲最佳，但7球全在客場失。