利大頭炮智在必得

猪拉多纳

08/12/2011
文： Mic少

南美球會盃決賽上演「大學打吡」，明早首回合由利加大學先在主場迎戰智利大學。眾所周知，厄瓜多爾勁旅「利大」最強武器係位處海拔2,850米高原主場，佢哋今屆五次喺自己地頭比賽，獲得全勝只失一球，表現無懈可擊，Mic少相信利加大學可以先拔頭籌，再追主Ｗ。（有線61及201台周五早上8時15分直播）




一般情況，球隊能否發揮出主場之利，往往受到主隊球迷數目、反應、氣氛影響，並唔太可靠。唯獨高原主場例外，皆因海拔高度係好客觀存在，千百年不變，而且高原氣候係好實質直接影響球員身體，比起球迷噓聲，更有效打擊對手。




正因為咁，利加大學主場戰績非常穩定，今屆南球盃由第一圈至今，五次主場出擊全勝，只失一球，可見其他球隊去到厄瓜多爾首都基多比賽，幾乎毫無反擊之力。由於利加大學主強客弱特性太過明顯，球隊更加要把握有地利優勢贏到盡，以免次回合作客被對手收復失地，「利大」今仗爭勝決心肯定高昂。


智大次回合先晒冷


至於智利大學今屆表現亦相當好，十戰錄得八勝二和，但喺高原比賽，能否發揮出正常水準，令人懷疑。事實上，「智大」今仗只要唔係大敗，次回合返到主場仍然有得追，尤其係「利大」作客冇料到，預料「智大」唔會太冒進。仲有一點要留意，南球盃決賽並唔計作客入球優惠，亦減低「智大」今仗爭取入球嘅誘因，除咗捧主勝外，亦可考慮入球細。