紅魔強陣攻陷巴素利

猪拉多纳

07/12/2011
文： 力奇

以為抽到好籤，點知踢完歐聯5輪分組賽，曼聯喺C組竟然仲未出到線，今晚嚟到關鍵生死戰，力奇肯定費Sir唔敢再玩嘢，兩大新星韋碧克同菲爾鍾斯均被委以重任統領攻守，強陣殺去瑞士硬撼巴素利，當然唔係遊山玩水睇雪山，1.52倍客勝應該穩陣啦！（有線61、201及中央5台周四凌晨3:45直播）


由分組賽抽完籤開始，曼聯領隊費格遜一直以為出線十拿九穩，前5輪出戰都絕少出到最強陣容，就算星級主力如朗尼都只係踢得3場咁大把，真正踢齊5場就只得包括拿尼同路爾斯華倫西亞等4人，反而達施華孖仔同埋後備中堅莊尼伊雲斯成日有機會落場。力奇覺得費Sir唔係唔重視分組賽，只係一直自信心太強，結果發揮麻麻，搞到家陣仲要攞多1分先可以出線，不過講到底，力奇深信只要費Sir一㩒掣，要贏巴素利呢類歐洲二線球隊，根本係執豆咁易。

曼聯韋碧克孭飛 傑斯候命

冇錯，佢哋今場前線肯定有「小豌豆」查維亞靴南迪斯缺陣，貝碧托夫到尋日都仲未操得，應該趕唔切傷愈，不過新星韋碧克自上月踢國際賽後，上周末聯賽對維拉就及時復出後備登場，熱完身後今晚擔正，再加埋費Sir話明關鍵時刻會擺埋傑斯落場，前線入球能力毋須擔心。至於中場線雖然話有卡域克停賽，但新仔菲爾鍾斯上仗串演防守中場一樣掂，有佢拍住費查夠晒穩陣，中堅位又有尼曼查維迪刑滿復出，要延續近8場歐聯客場7場冇失波嘅走勢，應該冇難度啦！

巴素利焗攻仲易出事

瑞士冠軍巴素利呢邊，過去僅曾一次突破分組賽，今次同曼聯、賓菲加同組都可以鬥到最後一輪，都算有晒交代。首循環作客奧脫福和曼聯3:3，表現雖然好，但力奇認為係紅魔防線走樣先係主因，吸收過教訓，巴素利想再偷雞睇怕都幾難。唔好唔記得，佢哋今仗仲要係和波都唔掂，焗住攻盞後防空虛，隨時出事。