曼城求生 打爆拜仁

猪拉多纳

07/12/2011
文： 阿占

盡人事、聽天命，曼城歐聯求奇迹曙光！億萬大軍曼城今季強勢衝擊歐聯，可惜分組賽就落入死亡A組，今晚最後一場分組賽唔單止要主場擊敗拜仁慕尼黑，仲要望拿玻里失分先可以出線，難度係就係好高，不過領隊文仙尼講明會全力爭取奇迹，今場要贏踢風流波嘅拜仁唔難，1.55倍主勝值得支持。（有線64、204周四凌晨3:45直播）


曼城作為歐聯新手，無乜歐洲賽系數傍身，落入死亡之組無疑相當無奈，以一個球迷立場，當然希望見到娛樂性十足嘅曼城可以晉級，依家佢哋落後拿玻里1分，對賽成績又唔及對手，要晉級除咗靠自己贏波仲要望人失分，今場對拜仁無得揀，背城借一出全力痛擊對手！

曼城主場無敵戰意盛

以阿古路、巴洛迪利、大衞施華等猛將組成嘅進攻線，每場比賽嘅合作愈見純熟，曼城喺歐聯嘅作戰經驗亦都與日俱增，再講佢哋班底有幾強大其實都冇乜意思，因為今仗係靠佢哋嘅必勝戰意食胡，以曼城今季主場無敵嘅戰績，要做好贏波本分唔難。

拜仁篤定首名當旅遊

作客嘅拜仁係小組最強球隊，佢哋亦已篤定首名出線，今場風流波好大機會會收起部分主力，留力德甲搏殺，希望喺歇冬前再拋離多慕遜加柏同多蒙特幾分，所以球員今場戰意好成疑問，而且核心人物舒韋恩史迪加剛啱先復操兩、三日，仲未敢同人碰撞，畢斯杜巴打中堅又唔穩陣，今場作客英格蘭睇怕都係當旅遊，唔會阻曼城發達。

橫數千軍

 曼城半場13戰不敗


‧今季10次主場出擊錄9勝1和。

‧近13場比賽都未試過半場落後，非常硬淨。

 拜仁連續6場失波

‧最近6場比賽場場有失波。

‧今屆歐聯5場分組賽場均攻入2.2球。

頂占筍盤：曼城（主勝）

有線球彩台主持阿占

電郵：soccer64@cabletv.com.hk 

PHONE波熱線：1831 678

「球彩俱樂部」開放時間：周三晚10:30至11:45